20160906

Curiosidades ribadenses: en festas

Parece que viu a luz onte: nota de prensa e bando de horario de festas. Está asinado en 'setembro', con horario dende o día 2, e colgada na web do concello ('modificada') o 'Lun 05 Set 2016 18:59:53 CEST', e dado que aparece no xornal de hoxe, tampouco foi transmitida doutro xeito con anterioridade. É dicir, a información que rexiría para a noite do día 2 foi colgada pasada a media tarde do día 5. Polo demáis, boa idea a de facer un anuncio do horario a cumprir. Era hora (ou diriamos 'era ano'?).
Unha cousa máis: apunta á Policía Local como garante. Está todas as noites da semana de servizo?
Saúdos e boas festas!
Nota de prensa:
"

Novas

SUÁREZ AGARDA QUE SEXAN UNHAS BOAS DATAS PARA TOD@S

Bando para as festas

05/09/2016
O Concello ven de anunciar nun bando os horarios para o remate das actividades vinculadas ás festas da patroa que se celebran durante estes días. O luns 5 e o martes 6 deberán ter rematado á unha da mañá, mentres que o mércores 7 poderán alongarse ata ás cinco da madrugada, o xoves 8 ata as catro, e o venres 9 e sábado 10 ata ás catro e media.
O alcalde, Fernando Suárez, manifestou que "xa metidos nesta semana de festas da patroa, neste broche final do verán, neste importante verán que tivemos aquí en Ribadeo, agora toca a ilusión destes días, que son moito máis que bulicio e diversión. Son o reflexo do que somos os de Ribadeo e o xeito que temos de gozar da nosa xente e da nosa terra".
Fernando Suárez subliñou que "neste bando que vimos de publicar dispoñemos que estes días se convertan nunha fervenza de risas, de alegría, en un fluír de xente de aquí e de acolá que se achega aquí en Ribadeo. A nosa vila queremos que sexa modelo de limpeza, de orde e de apacible convivir".
O rexedor ribadense engadiu que "tamén queremos lembrar que debe haber uns límites en canto a horarios e a ruídos tanto das orquestras, das atraccións, das barracas, etc… para poder convivir todos os que queren gozar e os que queren ou teñen que descansar. Como son bastantes días decidimos ir ao máximo que permite a lexislación actual, pero nalgúns deles dado que ao día seguinte é laborable resolvemos dar un horario pequeno".
O alcalde de Ribadeo cre que "no conxunto de todos os días hai tempo máis que dabondo para rir, bailar, gozar, pasalo ben, ir ás atraccións, respectando aos que non poden ou teñen que traballar. En cumprimento destes horarios máximos permitidos deberán cesar as actividades tanto das orquestras como das barracas e demais actividades con son, facultando á Policía Local para que garanta o cumprimento efectivo destas autorizacións".
Suárez Barcia engadiu que "ademais en materia de volume emitido polas orquestras, as atraccións ou polo resto das actividades vinculadas aos festexos da patroa terán que ter un especial coidado e deberán conciliar todo isto especialmente a partir das tres da mañá para os días nos que os festexos rematen en horario posterior".
Fernando Suárez concluía: "confío, desexo e agardamos desde o goberno e a Corporación Municipal que sexan unhas boas festas para todos e para todas e as vivamos con ledicia, paz, orde, harmonía e respecto".
"
O bando, en Issuu:

Ningún comentario: