20080720

Nota de prensa do concello sobre Mahía


Que conste que hai tempo que digo da responsabilidade patrimonial dos alcaldes: se o anterior tivera esa responsabilidade patrimonial, seguramente non estariamos vivindo estas ameazas por parte de Mahía. Lembro a solidariedade de O Tesón coa actual visión do concello sobre o tema, xa manifestada no blog.
Cun pouco máis de alegría, a foto de como se recuperou o derrumbe no paseo ó faro.

A EMPRESA MAHÍA RECLÁMALLE AO CONCELLO EN CONCEPTO DE RESPONSABILIDADE PATRIMONIAL MÁIS DE 15 MILLÓNS DE EUROS. O ALCALDE ANUNCIA QUE PRESENTARÁ TODOS OS RECURSOS XURÍDICOS E LEGAIS QUE SEXA POSIBLE PARA QUE ESTO NON VAIA PARA ADIANTE.
Ribadeo, 18 de xullo de 2008. A empresa Mahía ven de presentar no rexistro do Concello unha reclamación en concepto de responsabilidade patrimonial por importe de 15.700.000 euros, segundo acaba de anunciar o alcalde, Fernando Suárez. O rexedor asegura que "esto ven dado cando aló polo mandato anterior o alcalde e o seu grupo (o PSOE) aprobaron de xeito inicial cos seus votos, e cos votos en contra do BNG e a abstención do PP varios convenios urbanísticos que no seu momento xa se apuntara que suponían un crecemento absolutamente desproporcionado para Ribadeo e que a Xunta nunca ía autorizar". Suárez Barcia engade que "despois daqueles cinco convenios viñeron outros dezasete, pero posteriormente a Dirección Xeral de Urbanismo dixo que este tipo de crecementos eran inadmisibles".
O alcalde recoñece "unha certa preocupación por esta reclamación de responsabilidade patrimonial. Teño eu e o resto da Corporación temos que defender os intereses do Concello e imos procurar todos os recursos xurídicos e legais que estean ao noso alcance para impedir que esto poida chegar a ter unha repercusión económica negativa para o Concello de Ribadeo. É importante que a xente saque conclusións de algo que foi moi polémico no seu día e eu creo que ven moi ben aquel de dito de aquellos polvos estos lodos". Fernando Suárez lembra que "os convenios se aprobaron inicialmente, non definitivamente e que non se chegaron a incorporar ao planeamento aprobado inicialmente hai uns meses e consensuado por todos. Foi un acerto porque xa Urbanismo dixo que eso de convertir eucaliptales en urbanizacións de 300 ou 400 chalés é unha brutalidade inadmisible".
Anécdota de mal gusto
O rexedor cre que "desde logo este tipo de previsións no seu momento de utilizar as institucións para defender intereses privados está pasado nesta Galiza que non é a mesma de hai 3 ou 4 anos, pero creo que nos teremos que armar xurídicamente para que esto non saia para adiante. Pero ademáis hai un argumento que lles pode afectar a todos os veciños de Ribadeo…. a edificabilidade que pretendía a empresa Mahía é algo que podería hipotecar gravemente os intereses do Concello, non só desde a perspectiva da ordenación do territorio e do modelo de vila e de Concello que queremos e que dista radilcamente deste tipo de crecemento un tanto de pelotazo pero ademáis tamén este tipo de crecemento deixaría nunha sola empresa máis de 80.000 metros cadrados de edificabilidade que se lles quitaría aos veciños de Ribadeo e esto sí que afecta ao conxunto dos veciños e propietarios".
Fernando Suárez agarda que todo esto "quede nunha anécdota de mal gusto que se iniciou no mandato anterior e que colea outra vez".

Ningún comentario: